सिंहदरबारस्थित राष्ट्रिय स्वतन्त्र पार्टी (रास्वपा) को संसदीय दलको कार्यालयमा महत्वपूर्ण सर्वदलीय बैठक सुरु भएको छ। रास्वपा सभापति रवि लामिछानेको विशेष पहलमा आयोजना गरिएको यस बैठकमा मुलुकका प्रमुख राजनीतिक दलका शीर्ष नेताहरूको उपस्थिति रहेको छ। बैठकको मुख्य एजेन्डा हालैका प्राकृतिक विपत्तिपछिको जोखिम न्यूनीकरण र प्रभावकारी व्यवस्थापनका लागि एक उच्चस्तरीय राजनीतिक संयन्त्र निर्माण गर्नु रहेको छ।
छलफलमा नेपाली कांग्रेसका महामन्त्री गगनकुमार थापा, नेकपा एमालेकी सचिव पद्मा अर्याल, नेकपा एकीकृत समाजवादीका अध्यक्ष माधवकुमार नेपाल र नेकपा माओवादी केन्द्रका नेता वर्षमान पुन सहभागी छन्। त्यसैगरी, राप्रपा संसदीय दलका नेता ज्ञानेन्द्र शाही र जनमत पार्टीका अध्यक्ष डा. सीके राउत लगायतका नेताहरू पनि सिंहदरबार पुगेर छलफलमा जुटेका छन्।
मुलुकमा आइपर्ने विपद्का समयमा सबै राजनीतिक दलहरूबीच साझा धारणा बनाउन र राहत तथा उद्धार कार्यलाई थप व्यवस्थित तुल्याउन यस्तो संयन्त्रको आवश्यकता महसुस गरिएको हो। सहभागी नेताहरूले विपद् व्यवस्थापनका लागि आवश्यक नीतिगत र व्यावहारिक पक्षहरूका बारेमा आ-आफ्नो धारणा राखिरहेका छन्।