काठमाडौँ उपत्यकाका उपभोक्ताहरूले अब एक हजारभन्दा बढी बिक्री केन्द्रहरूबाट प्रतिकिलो ११० रुपैयाँमा चिनी खरिद गर्न सक्ने भएका छन्। वाणिज्य, आपूर्ति तथा उपभोक्ता संरक्षण विभागले आज एक विज्ञप्ति जारी गर्दै बजारमा चिनीको पर्याप्त आपूर्ति भइरहेको जानकारी दिएको छ। विभागले चिनीको कुनै अभाव नरहेको स्पष्ट पार्दै उपभोक्ताहरूलाई अनावश्यक रूपमा सञ्चय नगर्न समेत आग्रह गरेको छ।
पछिल्लो समय बजारमा चिनीको मूल्य अस्वाभाविक रूपमा बढेको भन्दै सर्वसाधारणबाट गुनासो आएपछि सरकारले सक्रियता देखाएको हो। यसै सन्दर्भमा उद्योग, वाणिज्य तथा आपूर्ति मन्त्री दीपककुमार साहले गत मंगलबार सरोकारवाला पक्षहरूसँग विशेष छलफल गर्नुभएको थियो। सोही छलफल र बजार अनुगमनको नतिजास्वरूप अहिले सुलभ मूल्यमा चिनी उपलब्ध गराउने व्यवस्था मिलाइएको हो।
विभागले बजारमा कृत्रिम अभाव सिर्जना गर्ने वा तोकिएको मूल्यभन्दा बढी लिने व्यापारीहरूमाथि कडा निगरानी राखिने समेत जनाएको छ। उपभोक्ताहरूलाई ढुक्क भएर आवश्यकता अनुसार मात्र चिनी खरिद गर्न र बजारमा देखिएका समस्याबारे विभागलाई जानकारी गराउन समेत सूचित गरिएको छ।