सरकारले देशमा समस्याका रूपमा रहेको फोहोरलाई आयआर्जनको स्रोतका रूपमा उपयोग गर्ने महत्त्वाकांक्षी योजना अघि सारेको छ। बहुप्रतीक्षित फोहोरलाई मोहोरमा बदल्ने यस सोचलाई व्यवहारमा उतार्न कानुनी प्रक्रिया अगाडि बढाइएको छ।
यससम्बन्धी आवश्यक कानुनी प्रबन्ध मिलाउन पूर्वाधार विकास मन्त्री सुनिल लम्सालले प्रतिनिधिसभामा आधिकारिक रूपमा विधेयक दर्ता गराउनुभएको छ। दर्ता भएको यस विधेयकले फोहोरको दिगो प्रशोधन, पुनःप्रयोग र वैज्ञानिक व्यवस्थापनलाई प्राथमिकता दिएको छ।
विधेयक संसद्बाट पारित भएपछि फोहोर व्यवस्थापनमा निजी तथा सार्वजनिक क्षेत्रको सहभागिता वृद्धि भई वातावरण संरक्षणका साथै नयाँ आर्थिक लाभ हासिल हुने अपेक्षा गरिएको छ। सरकारको यस कदमले आधुनिक र स्वच्छ समाज निर्माणमा महत्त्वपूर्ण योगदान पुग्ने विश्वास लिइएको छ।