रसुवास्थित भोटेकोसी नदीमा आएको भीषण बाढीका कारण बेपत्ता भएकामध्ये थप ११ जनाको शव फेला परेको छ। निर्माणाधीन माथिल्लो त्रिशूली–१ जलविद्युत् आयोजनाको सुरुङभित्र खोजी गर्ने क्रममा ती शवहरू बाहिर निकालिएको हो। नदीमा आएको बाढी र लेदो सुरुङभित्र पसेपछि त्यहाँ कार्यरत मजदुर तथा कर्मचारीहरू सम्पर्कविहीन बनेका थिए।
घटनालगत्तै उद्धार तथा खोजी कार्यमा जुटेका सुरक्षाकर्मी र प्राविधिक टोलीले निरन्तरको प्रयासपछि सुरुङबाट शवहरू फेला पारेका हुन्। बाढीले जलविद्युत् आयोजनाको भौतिक संरचनामा ठूलो क्षति पुर्याउनुका साथै मानवीय क्षतिसमेत निम्त्याएको छ।
हाल फेला परेका मृतकहरूको पहिचान खुलाउने कार्य भइरहेको छ भने सुरुङ तथा आसपासका क्षेत्रमा अन्य बेपत्ताहरूको खोजी कार्य अझै जारी राखिएको छ। विपद्पछि स्थानीय प्रशासनले राहत तथा उद्धारलाई तीव्रता दिँदै आयोजनास्थलमा भएको क्षतिको थप विवरण संकलन गरिरहेको छ।