नेकपा एमालेभित्र नेतृत्व फेर्ने विषयलाई लिएर नयाँ तरङ्ग पैदा भएको छ। महासचिव शंकर पोखरेलले तयार पारेको साङ्गठनिक प्रतिवेदनमा अध्यक्ष केपी शर्मा ओलीको विदाइ हुनुपर्ने कुरालाई नै प्रमुख निष्कर्षका रूपमा प्रस्तुत गरिएको थियो। पार्टीलाई नयाँ ढंगले अघि बढाउन नेतृत्व हस्तान्तरण हुनुपर्ने पोखरेलको ठहर थियो।
तर, उक्त निष्कर्षप्रति असहमति जनाउँदै नेता प्रदीप ज्ञवालीले बिल्कुलै छुट्टै प्रतिवेदन तयार पारेका छन्। विशेष कुरा त के छ भने, ज्ञवाली प्रतिवेदन लेखनका लागि गठित कार्यदलका सदस्य समेत होइनन्। उनले अध्यक्ष ओलीकै प्रत्यक्ष निर्देशनमा यो नयाँ प्रतिवेदन तयार पारेका हुन्।
ज्ञवालीको प्रतिवेदनले महासचिव पोखरेलले अघि सारेको नेतृत्व परिवर्तनको सम्पूर्ण अंशलाई खारेज गरिदिएको छ। नेतृत्व बदल्ने प्रस्ताव पूर्ण रूपमा हटाएर उल्टै उक्त प्रतिवेदनमा अध्यक्ष ओलीको कार्यशैली र योगदानको उच्च प्रशंसासमेत समेटिएको छ।