बाराको जीतपुरसिमरा उपमहानगरपालिका–२ स्थित सिमरा मेनरोडमा रहेको एक होटलमा साथीको हत्या गरी फरार रहेका मुख्य अभियुक्तलाई प्रहरीले नियन्त्रणमा लिएको छ। जिल्ला प्रहरी कार्यालय बाराका अनुसार मुख्य अभियुक्तसहित यस घटनामा संलग्न अन्य तीन जनालाई पनि पक्राउ गरिएको छ।
पक्राउ पर्ने मुख्य अभियुक्त जीतपुरसिमरा–२ पाँचधुरे टोलका २५ वर्षीय आयुष राई रहेका छन्। आफ्नै साथीमाथि चक्कु प्रहार गरी ज्यान लिएर उनी घटनास्थलबाट फरार भएका थिए। प्रहरीको टोलीले तीव्रताका साथ खोजतलास गर्ने क्रममा शनिबार राति जीतपुरसिमरा–१६ महेन्द्रनगरस्थित एक धानखेतमा लुकिछिपी बसेको अवस्थामा राईलाई फेला पारी पक्राउ गरेको हो।
घटनामा संलग्न अन्य सहयोगीहरूलाई समेत प्रहरीले नियन्त्रणमा लिएर थप अनुसन्धान अघि बढाएको छ। पक्राउ परेकाहरूमाथि ज्यानसम्बन्धी कसुरमा कानुनी कारबाहीको प्रक्रिया अगाडि बढाइएको प्रहरीले जनाएको छ।