झापाको मेचीनगर नगरपालिका वडा नम्बर ३ स्थित तेलपानीमा आज बिहान एउटा जङ्गली हात्ती मृत अवस्थामा फेला परेको छ। स्थानीय बासिन्दाले धानबारीमा बयस्क दाह्रे हात्ती लडिरहेको देखेपछि तत्कालै सम्बन्धित निकायलाई खबर गरेका थिए। घटनाको जानकारी पाएलगत्तै डिभिजन वन कार्यालयको टोली अनुसन्धानका लागि त्यसतर्फ प्रस्थान गरिसकेको छ।
डिभिजन वन कार्यालयका प्रमुख नथुनी गोहीवार यादवका अनुसार हात्तीको मृत्युको ठोस कारण अहिले नै खुल्न सकेको छैन। वन कार्यालयको प्राविधिक टोलीले घटनास्थलको निरीक्षण र आवश्यक कानुनी प्रक्रिया पुरा गरेपछि मात्र मृत्युको यथार्थ विवरण प्राप्त हुने उहाँले बताउनुभयो। यो हात्ती कुन समयमा र कसरी मर्यो भन्ने विषयमा वन विज्ञहरूले अध्ययन गरिरहेका छन्।
मेचीनगरका वडा नम्बर २ देखि ५ सम्मका क्षेत्रहरू लामो समयदेखि जङ्गली हात्तीको समस्याबाट प्रताडित छन्। भारतबाट मेची नदी तरेर आउने हात्तीहरूले यस क्षेत्रमा मानवीय क्षति पुर्याउनुका साथै किसानको बालीनाली समेत सखाप पार्दै आएका छन्। स्थानीयले यस समस्याको दीर्घकालीन समाधान खोजिरहेका बेला हात्ती मृत फेला परेको यो घटनाले थप चर्चा पाएको छ।