काठमाडौँको बबरमहलस्थित नेपाल कला परिषद्को प्राङ्गणमा ‘नेपालका देवी देवताहरू: लोर्स एन्ड लेजेन्ड्स’ शीर्षकको भव्य कला प्रदर्शनी औपचारिक रूपमा सुरु भएको छ। नेपाली धार्मिक आख्यान, लोककथा र सांस्कृतिक वैभवलाई कलात्मक ढङ्गले प्रस्तुत गर्ने उद्देश्यका साथ यो प्रदर्शनी सञ्चालन गरिएको हो।
यस विशेष कला प्रदर्शनीमा देशभरका १५७ जना सिद्धहस्त कलाकारहरूले सिर्जना गरेका कूल २८५ वटा अनुपम कलाकृतिहरू प्रदर्शनका लागि राखिएका छन्। प्रदर्शनी स्थलमा अवलोकनकर्ताहरूले कलाकृतिहरूको हेराइको आनन्द लिनुका साथै आफूलाई मन परेका चित्रहरू खरिद समेत गर्न सक्ने व्यवस्था मिलाइएको छ।
नेपाली पौराणिक परम्परा र देवी-देवताका विविध स्वरूपहरूलाई क्यानभासमा उतारेर बनाइएका यी चित्रहरूले कलाप्रेमीहरूको मन जितिरहेका छन्। यो प्रदर्शनी आगामी असोज २४ गतेसम्म निरन्तर सञ्चालन हुनेछ।