तातोपानी भन्सार नाका खुलाउने विषयलाई लिएर राजनीतिक वृत्तमा जस लिने होडबाजी सुरु भएको छ। चीनतर्फको सडक मर्मतका कारण केही समयदेखि अवरुद्ध रहेको उक्त उत्तरी नाका आगामी ८ गतेसम्ममा सञ्चालनमा ल्याउने जानकारी चिनियाँ पक्षले अघि नै गराइसकेको थियो। तर, नाका स्वतः खुल्ने निश्चित भइसकेको अवस्थामा पनि राजनीतिक नेतृत्व भने आफ्नै दबाबका कारण नाका खुल्न लागेको देखाउन तल्लिन बनेको छ।
यसै क्रममा सांसद भारतप्रसाद पराजुलीले नाका शीघ्र सुचारु गराउन माग गर्दै परराष्ट्र मन्त्रालयमा ज्ञापनपत्र बुझाएका छन्। चिनियाँ अधिकारीहरूले नाका खोल्ने निश्चित समयसीमा पहिले नै तय गरिसकेका बेला बुझाइएको यो ज्ञापनपत्रलाई धेरैले विशुद्ध राजनीतिक स्टन्ट र जस लिने होडका रूपमा विश्लेषण गरेका छन्। काम भइसकेपछि त्यसको श्रेय लिने यस्तो प्रवृत्तिले जनमानसमा भने सकारात्मक सन्देश जान सकेको छैन।