संयुक्त राष्ट्रसङ्घको महासभामा भाग लिन न्यूयोर्क जान लागेका प्यालेस्टिनी अधिकारीहरूलाई अमेरिकाले भिसा दिन इन्कार गरेपछि युरोपेली सङ्घ (ईयू) ले असन्तुष्टि व्यक्त गरेको छ। वासिङ्टनले लगातार दोस्रो वर्ष पनि प्यालेस्टिनी प्रतिनिधिमण्डलको भिसा आवेदन अस्वीकृत गरेकोमा खेद प्रकट गर्दै ईयूले यो निर्णय तत्काल सच्याउन र पुनर्विचार गर्न आग्रह गरेको हो।
न्युयोर्कमा आयोजना भइरहेको विश्वकै ठूलो कूटनीतिक मञ्च महासभामा सबैको प्रतिनिधित्व हुनुपर्नेमा जोड दिँदै ईयूले अमेरिकी कदमको आलोचना गरेको छ। अमेरिकी विदेश विभागले सुरक्षा र अन्य कारणहरू देखाउँदै प्यालेस्टिनी प्रतिनिधिहरूलाई प्रवेशमा रोक लगाएको थियो। ईयूले संयुक्त राष्ट्रसङ्घको आयोजक राष्ट्रका रूपमा अमेरिकाले सबै प्रतिनिधिहरूलाई निष्पक्ष रूपमा पहुँच दिनुपर्ने दायित्व स्मरण गराएको छ।
यस भिसा अवरोधले प्यालेस्टिनी मुद्दालाई अन्तर्राष्ट्रिय स्तरमा राख्न बाधा पुग्ने र यसले कूटनीतिक सम्बन्धमा समेत जटिलता थप्ने विज्ञहरूले बताएका छन्। ईयूले प्यालेस्टिनी पक्षको सहभागिताले मात्रै क्षेत्रीय र विश्वव्यापी मुद्दाहरूमा सन्तुलित छलफल हुन सक्ने धारणा राखेको छ। अमेरिकाको यस कदमले कूटनीतिक वृत्तमा नयाँ बहस सिर्जना गरेको छ।